قريبا

قريبا....قريبا....قريبا....قريبا....قريبا....قريبا....قريبا....قريبا....

لنا عودة بأذن الله

الموضوع ده ان صعب على احكيه لكن ضاق صدري بها وحدي فاردت ان اشارككم بها ..تلك التجربة الرهيبه ،لن انسى ذلك اليوم ماحييت كنت عائدا من زياره بعض اصدقائي وتأخر بى الوقت فأثرت ان امشى فى هذا الطريق المظلم المهجور لانه اقصر الطرق وياليتني لم ادخله...
رائحه الدم تعبق المكان والصرخات تصم الاذان والاشلاء تتناثر هنا وهناك وفى وسط ذلك الجحيم االدنيوى وقفت اتأمل ما يحدث فى ذهول والعديد من الرجال يقفزون على تلك المسكينه ويكبلوها ثم يأخذوا فى ضربها بلا رحمه ومحاوله اخضاعها ولكنها كانت ابيه لم تخضع بسهوله ...ولكن الكثره تغلب الشجاعه فقد نجحوا فى هزيمتها والسيطره عليها..وهنا تقدم اكثرهم قساوه ويبدو عليه انه قائدهم
والقساوه واضحه على ملامح وجهه والبغض والكراهيه يشعون من عينيه وهو يحمل سلاحا حادا فى يديه ويقترب منها وبحركه مفاجئه قام بذبحها ..............يالله لن انسى ذلك المنظر المؤلم والدم يتطاير من رقبتها وصيحات الانتصار من حناجر الرجال فرحين بفعلتهم الشنيعه
وفى لحظاتها الاخيره وهى تئن بضعف رأيت فى عينيها نظره...... نظره تحمل الكثير والكثير من المعانى _نظره ظللت اذكرها الى ما بعد ذلك اليوم بسنوات _ نظره تحمل معانى الاباء والشجاعه والخوف والرهبه فى الوقت ذاته وما ان لفظت انفاسها الاخيره حتى تكالب عليها الرجال يوجهون اليها الطعنات وقاموا بوحشيه بسلخها من جلدها وتقطيع اعضاءها والتمثيل بها على الحائط وفى تلك اللحظه اخذت انظر اليهم بنظره تملأها المقت والبغض وتدور التسأولات فى عقلى
يا ترى كيلو اللحمه من البقره دى بكام؟؟؟؟؟؟؟؟

السلام عليكم ورحمه الله وبركاته

ازيكم يا بشر؟انا خلصت الامتحانات خالص وقولت اعيش اسبوعين فل بدل ما اعيش اسبوعين قلق واقضى بقيه الاجازه نكد .....المهم دلوقتى انا خطتنا الاجازه دى ان شاء الله مليانه بس الاول انا عندى اعلان

حاسس انك تعبان فى البلد دى؟؟؟؟قرفان وحاسس انك غريب فى بلدنا ؟؟؟؟مش عارف تتأقلم معانا ؟؟؟

حاولت تغير الفساد اللى فيها؟؟؟ جربت تمشى مع شيوعين ؟؟اخوان؟؟؟غد ؟؟؟جهاد؟؟؟منى؟؟؟ليلى ...اى حاجه !!!!!!!!!!مش نافع برضه

طب مشربتش من نيلها ؟؟؟جربت تغنيلها ؟؟؟جربت فى عز ما انت مضروب على قفاك تمشى فى شوارعها وتشكيلها

ممشيتش فى حواريها ؟؟طيب ما اتقلبتش فيها؟؟

ولا ليك بشله من أمن الدوله اتعلمت بيها؟؟

لو عملت كل ده ومنفعش يبقى تشترك معانا فى كورس النداله والنفاق

وهيكون شعارنا

عيش ندل تموت مستور

واللى عاوز يشترك معانا يشترك بس خلوا بالكم فى امتحان فى الاخر واللى هينجح ليه جايزه جامده

أوى وفيه امتحانات اضافيه ونقط اضافيه وان شاء الله هنبدأ الكورس كمان اسبوعين خلال الاسبوعين دول لينا بوستات مختلفه ومنوعه واحب اقولكم

وحشتوووووووووووووونى

يلا باى

بسم الله الرحمن الرحيم
ازيكم يا جماعه؟؟؟؟؟؟وحشتونى كلكم .........انا عارف انكم مخنوقين ومش عارفين تناموا ولا بتاكلوا وحياتكم بتنهار بس معلهش.......انا سامع واحد خفيف ورا بيقول انه لما صدق انى غورت.........ماشى يا عم بس انا متأكد انك الوحيد اللى بيكرهنى.......ايه ده من غير حدف طوب انا بقولكم اهو .........يعنى ايه كلكم يتكرهونى طيب ماشى بس ادعولى لان فاضل اسبوع وانا لسه لايص ومش عاوز لما اخش الامتحان استخدم اساليب غير شرعيه.......لا طبعا انا عمرى ما هغش
بس محتاج دعواتكم فعلا ..........ادعولى بقا

وانتظرونى بعد الامتحانات مواضيع بارده ومليون واحد اتكلم عليها ونيو لوك مقرف ويضعف النظر (عشان تبقوا تحدفوا طوب تانى)
واخيرا انى احبكم فى الله
ومش عاوز حد يقرأويعلق بس!!!!!!انا عوزكم تدعولى

الوداع

كله بيضحك على كله

· واحد بليد.. دخل امتحان عربي ...

: أعرب الجمل الآتيه :

1- ( سور الصين العظيم )

2- ( مرض جنون البقر )

اخينا تنح شويه ... وبعدين راح قايل ....

اجابة البتاعه الأولانيه ( سور الصين العظيم )

سور : هو البتاع اللي بينط من فوقه الحرامي عشان يخش البيوت ويسرق الصين : نوع من انواع الادوات المنزليه ... بس نوع مفتخر ... الطقم بيوصل ل 100 جنيه في العتبه

العظ : لما بيخش عليك حيوان بيعمل كده ... واشهر حيوان معروف بالحاجه دي ... هو الكلب

يم : تقريبا والله أعلم ... بحر او حاجه كده يعني الجمله كلها معناها -----لما ينط حرامي من فوق سور ... عشان يسرق طقم صيني .... الكلب هايعضه .. في البحر

اجابة البتاعه التانيه ( مرض جنون البقر )

مر : دي الحاجه اللي طعمها بيجيب مراره في الحلق .... ويخليك تفصل دماغك قوام

ض : تقريبا حاجه زياده ... شوية حبر في الورقه ولا حاجه ... مالهاش لازمه من الاعراب

جن : اللهم احفظنا من العفاريت والجن والحركات دي يارب ... احنا ناقصين مزاوله

ون : دي اصلا انجليزي ... ومعناها ( رقم واحد ) ... لغات انا برضه

ألب : دي جبال موجوده في بلاد بره ... وجبال عاليه قوي ... بتاع 200 كيلوجرام فوق سطح برج الجزيره

قر : ليها معنين حسب الجمله ذات نفسهاالمعنى الأولاني : الحسد والقر والكلام ده .... ودي مش راكبه على الحوار بتاعناالتاني : اختصار لكلمة ( قرنفل ) ... على طريقه المعلم ( رضا ) .... ---> انا باقص الكلا .... الكلام يعني ودي راكبه في الحوار ده ... يبقى معنى الجمله دي ------المراره لما تجيلك .. هات جني ( نمبر وان ) . عشان يطلع جبال الألب ... ويجيبلك قرنفلايه

\خلصنا الامتحان

لا تعليق

اذا حانت لحظه الفراق لا تقل وداعا ولكن قل الى اللقاء

مغلق للامتحاناتوهتوحشونى

انا كنت قولت ان البوست اللى فات اخر بوست بس ادبست فى تاج من اخى اخوانى حتى النخاع

1 / أذكر 10 أشياء عن نفسك

2 / اختر 5 أشخاص تهدى لهم التاج

3 / لا تهدى التاج لمن أهداك اياه

4/ أترك لصديقك الذى أهداك التاج بان التاج نزل وتعالى شوفه....

1:انا شخص رومانسى جدا بحب الطبيعة والتأمل واحلى وقت فى حياتى بقضيها فى مكان مفتوح (حديقة او حتى فوق سطوح بيتنا)

2:لو عيزين نتكلم بصراحة احب اقول ان انا راجل مش بحترم مواعيدى وناس كتير بتزعل منى بسبب التأخير

3:بعشق حاجة اسمها القرأه وخاصة قصص الصحابه وبحب اقرألدكتور خالد محمد خالد وبحب الروايات اللى تطغى فيها المشاعر الانسانيه

4:انا شخصيه نكديه بحب الحزن جدا ،قبل ما تقولوا عليا حاجات كتير مش كويسه فيه سبب وجيه لحبى للحزن ،انا بحبه لانه بيخلينى ابحث فى حياتى من أول وجديد واشوف الحاجات الغلط واصلحها

5:انا من النوع اللى بقطع على نفسى لنفسى وعود كتيره اوى ومش بنفذها عشان كده انا بعتبر نفسى (بينى وبينكم)عيل

6:بكره جدا الفشل ومش مؤمن بكلمه مستحيل واكتر حاجه تضايقنى ان حد يقول عليا فاشل

7:بحب جدا الصداقه وبقدرها للغايه ومؤمن ان الصديق كالمجوهرات النادره تجدها بصعوبه واذا وجدتها فحافظ عليها وعلى بريقها ولا تعرضها لعوامل التعريه ولا تبعها بأثمن الاسعار

8:نفسى انى اطلع صحفى ومؤمن ان اهم مقومات الصحفى الناجح مش القلم البراق ..لأ..الشجاعة والجرأه

والذكاء والقدره علىالصمود امام ضرب القفا ،وقيل قديما :ضرب القفا شفا

9:بحب افكر بطريقه عقلانيه ومنظمه واحب انى دايما افتح باب للمناقشات عشان كده شيه من اصحابى (مش كتيرأوى) بيقولوا عيا ..........متفذلك

10:اؤمن جدا بأهميه المرأه و شايف ان افضل صفه فى المرأه لازم تكون قدرتها على الاستماع واحب المرأة الهاديه واقدس الحياه الزوجيه واؤمن بضرورة المشاركه بين الزوجين وانا عن نفسى لما اتجوز

هساعد مراتى فى كل حاجه حتى الطبيخ

التاج ده كنتها هديه اول واحد لاخوانى حتى النخاع بس مينفعش عشان كده ههديه لكل من

1-مدونه قهوه محروس فى اليوم المنحوس لحببيب قلبى مهاجر

2-مدونة أمه الله لاختى موناليزا

3-مدونة انا مش سلبى لأخى

4-مصرية ... لكن متغاظة آ ند مفروسة

5:Gannahمدونة همسات مصريه

6صلطح باشا

معلهش انا خالفت التاج واهديته لسته

وانا كان نفسى انى اهدى التاج ده لناس اكتر

وا حب اقول لكل واحد خد منى التاج انه ممكن يعتذر نو بروبلم

انا اخوان ولا شيوعى ...مش مهم

حاجه غريبه فعلا لما الاقى مدونة صاحبها اخوانى ويخش عليه واحد اشتراكى ويقعد يشتم باسلوب جارح ويعترض على اقامه دوله اسلاميه أو الاقى واحد ليبرالى يخش على مدونة اشتراكيه ويشتم فيها باسلوب غير لائق او انى الاقى واحد اخوانى يعترض على اى حد يعارض فكرة اقامه دوله اسلاميه او تلاقى اى حد من اى حته بيعترض على اى حاجه يقولها اى حد يقول اى حاجه مش عجباه واحب اقولكم يا جماعه كلنا بنحب بلدنا وكلنا عاوزين نظام عادل

يحقق الديموقراطيه والمساواة يعنى احنا غايتنا واحده ولكن مع اختلاف الوسائل .

يا جماعه احنا كمدونين مع اختلاف انتمائتنا مهمتنا ان احنا بجانب مهمتنا فى هدم الفساد فى البلد دى احنا ننور الشعب ونعرض له جميع الافكار والانظمه والشعب عليه بختار ايه اللى هيحكمه اذا كان دوله اسلاميه ولا اشتراكيه

احنا عاوزين الشعب ده يضحك زى زمان لكن فى نفس الوقت هو اللى يختار مين اللى يضحكه ويضحكه ازاى

و التنافس للوصول للحكم بين الاحزاب والجماعات لازم غايته تكون اسعاد الشعب مش مجرد كرسى وخلاص

ولازم التنافس يكون شريف وعلى مستوى راقى وبالنسبه لينا كمدونين لازمالنقد يكون نقد ايجابى وبناء مش مجرد سب وقذف من اجل تشويه الفكر الاخر.

انا مؤمن جدا بحق الرأى الرأى الاخر ومش مهم انا اخوان ولا شيوعى ولا من حركه كفايه المهم انى بحب البلد دى بجد و لما انطق كلمه( مصر) كتبقاش مجرد كلمه ..........لأ دى مشاعر واحاسيس جواى

مش مهم انت ايه ..المهم انت عاوز للبلد دى ايه

انا كنت ناوى أطول معاكم كمان شويه لكن بعد نصيحهGannah ليه انا قررت ان دى تبقى اخر مقاله او بوست ليا

لحد الاجازه بس هبقى متواجد معاكم بتعليق او ملحوظه او اى حاجه وهتوحشونى